അടാട്ട് ഗ്രാമപഞ്ചായത്തിൽ സ്ഥിതി ചെയ്യുന്ന വിലങ്ങൻകുന്നിലെ വിനോദസഞ്ചാര സാധ്യതകൾ വിപുലീകരിക്കാൻ 3.45 കോടി രൂപയുടെ വികസന പദ്ധതിയ്ക്ക് സ്റ്റേറ്റ് വർക്കിംഗ് ഗ്രൂപ്പ് അംഗീകാരം നൽകിയതായി സേവ്യർ ചിറ്റിലപ്പിള്ളി എംഎൽഎ അറിയിച്ചു. വിലങ്ങൻകുന്നിലെ ആദ്യഘട്ട സൗന്ദര്യവൽകരണ പ്രവർത്തികൾക്കായി 2024-25 സാമ്പത്തിക വർഷത്തിൽ ഒരു കോടി രൂപയുടെ ഭരണാനുമതിയായി. പദ്ധതി നിർവ്വഹണം പുരോഗമിക്കുന്ന ഘട്ടത്തിൽ വരുന്ന സാമ്പത്തിക വർഷത്തിൽ തുടർന്നുള്ള ഭരണാനുമതി നേടാനാകും.
തൃശ്ശൂർ ജില്ലയിലെ അമല ആശുപത്രിയോട് ചേർന്ന് കിടക്കുന്ന വിനോദസഞ്ചാര കേന്ദ്രമാണ് വിലങ്ങൻകുന്ന്. കുന്നിനു മുകളിൽ നിന്നുള്ള തൃശ്ശൂർ നഗരത്തിന്റെ അതിമനോഹരമായ കാഴ്ചയാണ് ഇവിടുത്തെ പ്രധാന ആകർഷണം. വ്യായാമത്തിനും സൈക്കിൾ സവാരിക്കും മറ്റുമായി നിരവധി പേരാണ് ദിനംപ്രതി ഇവിടെയെത്തുന്നത്. വിലങ്ങൻകുന്നിന്റെ വിനോദസഞ്ചാര സാധ്യതകൾക്ക് കൂടുതൽ ഊർജ്ജം പകരുക എന്ന ലക്ഷ്യത്തോടെ സേവ്യർ ചിറ്റിലപ്പിള്ളി എംഎൽഎയുടെ നേതൃത്വത്തിൽ നടത്തിയ ഇടപെടലുകളിലൂടെയാണ് ആദ്യഘട്ട സൗന്ദര്യവൽകരണ വികസന പ്രവർത്തനങ്ങൾക്കായി വിനോദ സഞ്ചാര വകുപ്പ് ഒരു കോടി രൂപയുടെ ഭരണാനുമതി പുറപ്പെടുവിച്ച് ഉത്തരവായത്.
വിലങ്ങൻകുന്നിൽ നിന്നുള്ള അതിമനോഹരമായ ദൃശ്യം പൂർണ്ണമായി ആസ്വദിക്കാൻ ഉതകുന്ന വിധത്തിൽ വാച്ച് ടവർ, റസ്റ്റോറന്റ്, സെമിനാർ ഹാൾ, ബട്ടർഫ്ലൈ ഗാർഡൻ, ഓപ്പൺ ജിം ഉൾപ്പെടെയുള്ള സൗകര്യങ്ങളോടെയുള്ള പദ്ധതിയാണ് ഒരുങ്ങുന്നത്. ഇവ മുൻഗണനാ ക്രമത്തിൽ നിർമ്മാണം ആരംഭിക്കും. 3.45 കോടി രൂപ ആകെ ചിലവ് പ്രതീക്ഷിക്കുന്ന പദ്ധതി യാഥാർഥ്യമാകുന്നതോടെ വിലങ്ങൻകുന്ന് കേന്ദ്രീകരിച്ചുള്ള വിനോദസഞ്ചാര മേഖലയ്ക്ക് വലിയ ഉണർവ് ലഭിക്കും.
ടൂറിസം രംഗത്ത് വടക്കാഞ്ചേരി മണ്ഡലത്തിൽ നിരവധിയായ പ്രവർത്തനങ്ങളാണ് പുരോഗമിക്കുന്നത്. വാഴാനി ഡാമിൽ സംഗീത ജലധാര സ്ഥാപിക്കാനായി 5.99 കോടി രൂപ അനുവദിച്ച് പദ്ധതി ടെണ്ടർ ചെയ്തു. വാഴാനി ഡാമിലെ തൂക്കുപാലം അറ്റകുറ്റപ്പണികൾ നടത്തി തുറന്നുകൊടുത്തു. ടൂറിസം വകുപ്പ് അനുവദിച്ച 41 ലക്ഷം രൂപ വിനിയോഗിച്ച് കുട്ടികളുടെ പാർക്ക് നവീകരിച്ചു. ലൈബ്രറി കം കൾച്ചറൽ സെൻ്റർ പ്രവർത്തനം ആരംഭിച്ചു. വാഴാനി ഡാം കൺവെൻഷൻ സെൻ്റർ നിർമ്മാണത്തിനായി ഇറിഗേഷൻ വകുപ്പിൻ്റെ എൻ.ഓ.സി നേടാനായി.
വാഴാനി-പേരേപ്പാറ-ചാത്തൻചിറ - തൂമാനം - പൂമല ഡാം - പത്താഴക്കുണ്ട് -ചെപ്പാറ- വിലങ്ങൻ കുന്ന് - കോൾ ലാൻ്റ് എന്നിവയെ കൂട്ടിയിണക്കി 'വടക്കാഞ്ചേരി ടൂറിസം കോറിഡോർ' പദ്ധതി ബജറ്റിൽ നിർദ്ദേശിക്കുകയും 1.5 കോടി രൂപ വകയിരുത്തുകയും ചെയ്തു. പൂമല ഇക്കോ ടൂറിസം പദ്ധതിയ്ക്കായി 3.75 കോടി രൂപ അനുവദിച്ച് പ്രവൃത്തി നിർവ്വഹണം പുരോഗമിക്കുന്നു. ചെപ്പാറ റോക്ക് ഗാർഡനിൽ ഹൈമാസ്റ്റ് ലൈറ്റ് സ്ഥാപിച്ചു. ചെപ്പാറയിലെ അഡ്വഞ്ചർ ടൂറിസം സാധ്യതകൾ പരിശോധിച്ചു വരുന്നു. റെസ്പോൺസിബിൾ ടൂറിസം പദ്ധതിയിൽ പുഴയ്ക്കൽ കോൾ ലാൻ്റ് ടൂറിസം ഉൾപ്പെടുത്തുന്നതിനായി ആവശ്യപ്പെട്ടിട്ടുണ്ട്.
ഇതോടൊപ്പമാണ് വിലങ്ങൻ കുന്നിലെയും ടൂറിസം പദ്ധതിയ്ക്ക് അംഗീകാരമാകുന്നത്. യോഗങ്ങളും, കൂട്ടായ്മകളും, കലാ പരിപാടികളും സംഘടിപ്പിക്കാൻ സജ്ജമാക്കുന്നതോടൊപ്പം, ടൂറിസം കേന്ദ്രങ്ങളിൽ വിവാഹം നടത്തുന്ന 'ഡെസ്റ്റിനേഷൻ വെഡ്ഡിങ്' ഉൾപ്പെടയുള്ള പുതിയകാല ട്രെൻഡുകൾക്ക് ഇണങ്ങുന്ന വിധം വിലങ്ങൻകുന്നിന്റെ വികസനം യാഥാർത്ഥ്യമാക്കാനാണ് ലക്ഷ്യമിടുന്നതെന്നും, അതിനുവേണ്ടിയുള്ള പരിശ്രമങ്ങൾ തുടരുമെന്നും സേവ്യർ ചിറ്റിലപ്പിള്ളി എംഎൽഎ വ്യക്തമാക്കി.
എൻ മീഡിയ ഇപ്പോൾ വാട്സ്ആപ്പിലും ലഭ്യമാണ്. ഏറ്റവും പുതിയ വാർത്തകൾക്കായി ക്ലിക്ക് ചെയ്യൂ👇
https://chat.whatsapp.com/FX16iijLtA9FHNfxI9dYhG
.jpg)
0 അഭിപ്രായങ്ങള്‍