🔴 ഡ്രൈവർ നിയമനത്തിൽ യുവജന വിരുദ്ധമായി നടത്തിയ നിയമ വിരുദ്ധ നടപടി പിൻവലിക്കണമെന്നാവശ്യപ്പെട്ട് ഡിവൈഎഫ്ഐ രംഗത്ത്.🔴

ഡ്രൈവർ നിയമനത്തിൽ യുവജന വിരുദ്ധമായി നടത്തിയ നിയമ വിരുദ്ധ നടപടി പിൻവലിക്കണമെന്നാവശ്യപ്പെട്ട് ഡിവൈഎഫ്ഐ രംഗത്ത്.

മുള്ളൂർക്കര ഗ്രാമ പഞ്ചായത്തിൽ നിലവിൽ പുറത്തിറക്കിയിരിക്കുന്ന ഡ്രൈവർ നിയമന വിജ്ഞാപനത്തിൽ, സർക്കാർ ഉത്തരവുകൾ പ്രകാരം വ്യക്തമായി നിശ്ചയിച്ചിരിക്കുന്ന പരമാവധി പ്രായപരിധിയായ 41 വയസ് ലംഘിച്ച് 61 വയസ് വരെ പ്രായപരിധി നിശ്ചയിച്ചിരിക്കുന്നതായി പറയുന്നു.

ലോക്കൽ സെൽഫ് ഗവൺമെന്റ് വകുപ്പ് പുറത്തിറക്കിയ സർക്കാർ ഉത്തരവുകൾ പ്രകാരം ഡ്രൈവർ തസ്തികയിലേക്കുള്ള നിയമനത്തിന് പരമാവധി പ്രായപരിധി 41 വയസ് വരെ മാത്രമാണെന്നത് വ്യക്തമാണ്. അങ്ങനെയിരിക്കെ, ഈ നിയമം പൂർണമായി അവഗണിച്ചുകൊണ്ട് പഞ്ചായത്ത് തലത്തിൽ സ്വമേധയാ പ്രായപരിധി മാറ്റി നിശ്ചയിച്ചിരിക്കുന്നത് തികച്ചും നിയമവിരുദ്ധവും യുവജന വിരുദ്ധവുമായ നടപടിയാണ്.

തൊഴിൽ തേടി നിൽക്കുന്ന അനേകം യോഗ്യരായ യുവാക്കളെ അവസരങ്ങളിൽ നിന്ന് പുറത്താക്കി, വിരമിച്ചവർക്കും പ്രായപരിധി കഴിഞ്ഞവർക്കും വഴിയൊരുക്കുന്ന ഈ നടപടി സമത്വത്തിനും സാമൂഹ്യനീതിക്കും ഭരണഘടനാ മൂല്യങ്ങൾക്കും വിരുദ്ധമാണ്. ഒരു തദ്ദേശ സ്വയംഭരണ സ്ഥാപനത്തിനും സർക്കാർ ഉത്തരവുകൾ ലംഘിച്ച് സ്വന്തം നിലയ്ക്ക് നിയമന മാനദണ്ഡങ്ങൾ മാറ്റി നിശ്ചയിക്കാനുള്ള അധികാരമില്ല.

അതിനാൽ, സർക്കാർ ഉത്തരവുകൾ ലംഘിച്ച് നടത്തിയ ഈ ഡ്രൈവർ നിയമന നടപടികൾ ഉടൻ പിൻവലിക്കണമെന്നും, നിലവിലുള്ള നിയമങ്ങൾക്ക് അനുസൃതമായി പരമാവധി പ്രായപരിധി പുനഃസ്ഥാപിച്ച് നിയമപരമായ രീതിയിൽ പുതിയ വിജ്ഞാപനം പുറപ്പെടുവിക്കണമെന്നും ഡിവൈഎഫ് ഐ പഞ്ചായത്ത് സെക്രട്ടറിക്ക് പരാതി നൽകി.

ഇക്കാര്യത്തിൽ അടിയന്തരമായി നടപടി സ്വീകരിച്ചില്ലെങ്കിൽ, വിഷയം ബന്ധപ്പെട്ട അധികാരികളുടെ ശ്രദ്ധയിൽപ്പെടുത്തുന്നതടക്കം ജനാധിപത്യപരമായ പ്രതിഷേധ നടപടികളിലേക്ക് ഡിവൈഎഫ്ഐ നിർബന്ധിതരാകുന്നതാണെന്ന് ഡിവൈഎഫ്ഐ മുള്ളൂർക്കര മേഖല സെക്രട്ടറി ഘഗൻ അറിയിച്ചു.