🔴രാഹുലിനെ തളയ്ക്കാൻ പഴുതടച്ച നീക്കം: ഓപ്പറേഷന് ചുക്കാൻ പിടിച്ച് പൂങ്കുഴലി ഐപിഎസ്.▶️

രാഹുലിനെ തളയ്ക്കാൻ പഴുതടച്ച നീക്കം: ഓപ്പറേഷന് ചുക്കാൻ പിടിച്ച് പൂങ്കുഴലി ഐപിഎസ്

രാഹുൽ മാങ്കൂട്ടത്തിലിന്റെ അറസ്റ്റിന് പിന്നിൽ പൂങ്കുഴലി ഐപിഎസിന്റെ നേതൃത്വത്തിലുള്ള അതീവ രഹസ്യവും തന്ത്രപരവുമായ നീക്കങ്ങൾ. കാനഡയിലുള്ള തിരുവല്ല സ്വദേശിനി മുഖ്യമന്ത്രിക്ക് നൽകിയ ഇമെയിൽ പരാതിയിൽ ക്രൈംബ്രാഞ്ച് അന്വേഷണം പ്രഖ്യാപിച്ചതോടെയാണ് നാടകീയ നീക്കങ്ങൾക്ക് തുടക്കമായത്. പ്രതിയെ കൈവിട്ടുപോകാതിരിക്കാൻ ഷൊർണ്ണൂർ ഡിവൈഎസ്പിയെ മാത്രം വിശ്വാസത്തിലെടുത്താണ് പൂങ്കുഴലി ഐപിഎസ് ഓപ്പറേഷൻ പ്ലാൻ ചെയ്തത്. യുവതി നാട്ടിലെത്തുന്നതിന് മുൻപേ അറസ്റ്റ് രേഖപ്പെടുത്തുക എന്നതായിരുന്നു ലക്ഷ്യം. കഴിഞ്ഞ രണ്ട് ദിവസമായി രാഹുൽ താമസിച്ച ഹോട്ടലിൽ തന്നെ പോലീസ് ഉദ്യോഗസ്ഥർ രഹസ്യമായി താമസിച്ച് ഓരോ നീക്കങ്ങളും നിരീക്ഷിച്ചു വരികയായിരുന്നു.

പീഡനത്തിന് പുറമെ പണം തട്ടാൻ ശ്രമിച്ചു, ഗർഭഛിദ്രത്തിന് നിർബന്ധിച്ചു തുടങ്ങിയ അതീവ ഗുരുതരമായ ആരോപണങ്ങളാണ് പരാതിയിലുള്ളത്. പാലക്കാട് ഫ്ലാറ്റ് വാങ്ങി നൽകാൻ നിർബന്ധിച്ചതായും മൊഴിയുണ്ട്. അർദ്ധരാത്രി 12:15-ഓടെ ഹോട്ടലിലെത്തിയ പോലീസ് സംഘം, വിവരങ്ങൾ ചോരാതിരിക്കാൻ ജീവനക്കാരുടെ ഫോണുകൾ പിടിച്ചെടുത്ത ശേഷമാണ് നടപടികളിലേക്ക് കടന്നത്. ഒടുവിൽ 12:30-ഓടെ വാതിൽ തകർക്കാതെ തന്നെ തന്ത്രപരമായി അകത്തുകയറി രാഹുലിനെ കസ്റ്റഡിയിലെടുക്കുകയായിരുന്നു. മുൻ കേസുകളിൽ കോടതി നടപടികൾ പോലീസിന് തിരിച്ചടിയായ പശ്ചാത്തലത്തിൽ, ഇത്തവണ പഴുതടച്ച നീക്കങ്ങളിലൂടെയാണ് പൂങ്കുഴലി ഐപിഎസ് അന്വേഷണം മുന്നോട്ട് കൊണ്ടുപോയത്.