🌏മുള്ളൂർക്കര - ആറ്റൂർ മണ്ഡലംകുന്നിൽ വയോധികരായ മൂന്ന് സഹോദരിമാരെ വീടിനുള്ളിൽ അവശനിലയിൽ കണ്ടെത്തി. കൂട്ട ആത്മഹത്യാശ്രമമെന്ന് നിഗമനം. സഹോദരിമാരിൽ ഒരാളായ സരോജിനി (75) മരിച്ചു.🌏

മുള്ളൂർക്കര - ആറ്റൂർ മണ്ഡലംകുന്നിൽ വയോധികരായ മൂന്ന് സഹോദരിമാരെ വീടിനുള്ളിൽ അവശനിലയിൽ കണ്ടെത്തി. കൂട്ട ആത്മഹത്യാശ്രമമാണെന്നാണ് പ്രാഥമിക നിഗമനം. അവിവാഹിതരായ ഇവരുടെ  ജീവിത നൈരാശ്യമാണ് പ്രേരണയായതെന്നും പറയുന്നു. ആശുപത്രിയിൽ എത്തിച്ചെങ്കിലും , സഹോദരിമാരിൽ ഒരാളായ സരോജിനി (75) മരിച്ചു. മറ്റു രണ്ടു പേർ ഗുരുതരാവസ്ഥയിൽ മെഡിക്കൽ കോളേജ് ആശുപത്രിയിൽ തീവ്രപരിചരണ വിഭാഗത്തിൽ തുടരുന്നു. ഇന്ന് രാവിലെയാണ് നാടിനെ നടുക്കിയ സംഭവം പുറം ലോകം അറിഞ്ഞത്. മുള്ളൂർക്കര - ആറ്റൂർ - മണ്ഡലംകുന്ന് മടത്തിൽപ്പറമ്പിൽ വീട്ടിലാണ് ദാരുണ സംഭവം അരങ്ങേറിയത്. സഹോദരിമാരായ ദേവകി (83) ജാനകി (80) സരോജിനി ( 75 ) എന്നിവരെയാണ് അവശനിലയിൽ വീടിനുള്ളിൽ കണ്ടെത്തിയത്. രാവിലെയായിട്ടും വീടിൻ്റെ വാതിൽ തുറക്കാത്തതിനെ തുടർന്ന് അയൽവാസികൾ നടത്തിയ പരിശോധനയിലാണ് മൂന്ന് പേരെ അവശനിലയിൽ കണ്ടത്. വിവരമറിഞ്ഞ് എത്തിയ മുള്ളൂർക്കര പഞ്ചായത്ത് പ്രസിഡൻ്റ് എൻ. എസ്. വർഗീസും , വാർഡംഗവും നാട്ടുകാരും ചേർന്ന് വടക്കാഞ്ചേരി ജില്ലാ ആശുപത്രിയിൽ എത്തിച്ചെങ്കിലും സരോജിനി മരിച്ചിരുന്നു. പോലീസ് സ്ഥലത്തെത്തി മേൽ നടപടികൾ സ്വീകരിച്ച് അന്വേഷണം ഊർജിതമാക്കി.