തൃശ്ശൂർ-ഷൊർണൂർ സംസ്ഥാന പാതയിൽ വടക്കാഞ്ചേരി നഗരം പൂർണമായും ഗതാഗത സ്തംഭനത്തിൽ കുടുങ്ങിയത് ജനജീവിതം ദുസ്സഹമാക്കി.
യാതൊരു മുന്നറിയിപ്പുമില്ലാതെ പകൽ സമയത്ത് റോഡ് ടാറിങ് ജോലികൾ ആരംഭിച്ചതാണ് മണിക്കൂറുകളോളം നീണ്ട ഈ വൻ കുരുക്കിന് കാരണം. രാവിലെ ഒൻപത് മണിയോടെ തുടങ്ങിയ ഗതാഗത സ്തംഭനം ഉച്ചയ്ക്ക് രണ്ട് മണിയോടെ മാത്രമാണ് ഭാഗികമായി പരിഹരിക്കാനായത്.വടക്കാഞ്ചേരി
റെയിൽവേ സ്റ്റേഷൻ മുതൽ മുള്ളൂർക്കര വരെ വാഹനങ്ങളുടെ നീണ്ട നിര കിലോമീറ്ററുകളോളം നീണ്ടുനിന്നു. പ്രധാന പാതയിലെ ഗതാഗതം പൂർണമായി നിലച്ചതോടെ ഇരു ദിശകളിലേക്കും യാത്രക്കാർ കുടുങ്ങി. ഈ കുരുക്കിൽ നിന്ന് പുറത്തു കടക്കാൻ പലർക്കും ഒരു മണിക്കൂറിലധികം സമയമെടുത്തു. കുന്നംകുളം റോഡിലും വാഴാനി റോഡിലും സമാനമായി കിലോമീറ്ററുകളോളം വാഹനങ്ങൾ കെട്ടിക്കിടന്നു.
ഗതാഗതക്കുരുക്ക് രൂക്ഷമായതോടെ അടിയന്തര സാഹചര്യങ്ങളിൽ പോയ ആംബുലൻസുകൾക്ക് പോലും മുന്നോട്ട് പോകാൻ കഴിയാത്ത അവസ്ഥയുണ്ടായി. സമയത്തിന് ജോലിസ്ഥലത്തും വിദ്യാലയങ്ങളിലും എത്താൻ കഴിയാതെ നൂറുകണക്കിന് ആളുകളാണ് ദുരിതത്തിലായത്.
രാത്രികാലങ്ങളിൽ ചെയ്യേണ്ട റോഡിന്റെ അറ്റകുറ്റപ്പണികൾ പകൽ സമയത്ത് നടത്തി ജനങ്ങളെ ദുരിതത്തിലാക്കിയത് അധികൃതരുടെ ജനങ്ങളോടുള്ള വെല്ലുവിളിയാണെന്ന് ഡിസിസി ജനറൽ സെക്രട്ടറി കെ. അജിത് കുമാർ ആരോപിച്ചു. വടക്കാഞ്ചേരി പോലൊരു പ്രധാന ജംഗ്ഷനിൽ പോലും ഗതാഗതം നിയന്ത്രിക്കാൻ പോലീസുകാരോ മറ്റ് ഉദ്യോഗസ്ഥരോ ഇല്ലെന്നും അദ്ദേഹം പറഞ്ഞു. നഗരസഭ, എംഎൽഎ, പോലീസ്, എംഡിഐ (എംഡി) അടക്കമുള്ള ബന്ധപ്പെട്ട അധികാരികളുടെ തികച്ചും ഉത്തരവാദിത്വ രഹിതമായ പ്രവർത്തനമാണ് നഗരത്തെ സ്തംഭിപ്പിച്ചതെന്നും, നിരന്തരമായി അനുഭവപ്പെടുന്ന ഈ ട്രാഫിക് ബ്ലോക്ക് പരിഹരിക്കാൻ അടിയന്തര നടപടി സ്വീകരിക്കണമെന്നും അജിത് കുമാർ ആവശ്യപ്പെട്ടു.
.jpg)
0 അഭിപ്രായങ്ങള്‍