അവണൂർ - വരടിയം, അമല - ചൂരക്കാട്ടുകര റോഡുകൾ ബി.എം & ബി.സി നിലവാരത്തിലേക്ക്; 6.5 കോടി രൂപ അനുവദിച്ചതായി സേവ്യർ ചിറ്റിലപ്പിള്ളി എം.എൽ.എ.
2025-26 സാമ്പത്തിക വർഷത്തെ പൊതുമരാമത്ത് വകുപ്പ് പ്രവർത്തികളിൽ ഉൾപ്പെടുത്തി വടക്കാഞ്ചേരി മണ്ഡലത്തിലെ രണ്ട് റോഡുകൾക്കായി 6.5 കോടി രൂപയുടെ ഭരണാനുമതി ലഭിച്ചു.
അവണൂര്‍ മുതല്‍ അമല വരെ ബന്ധിപ്പിക്കുന്ന അവണൂര്‍ - വരടിയം റോഡ് (കിണര്‍ സ്റ്റോപ്പ് മുതല്‍ വരടിയം സ്കൂള്‍ വരെയും), അമല ചൂരക്കാട്ടുക്കര റോഡ് (വരടിയം മുതല്‍ അമല വരെയും) ആകെ 4.76 കിലോമീറ്റര്‍ ദൂരം ബിഎം & ബിസി നിലവാരത്തിലേക്കുയര്‍ത്തുന്ന പ്രവൃത്തികൾക്കായാണ് ശബരിമല പ്രത്യേക പദ്ധതിയില്‍ 6.5 കോടി രൂപ അനുവദിച്ചത്.
അവണൂര്‍ വരടിയം റോഡ് കിണര്‍ സ്റ്റോപ്പ് മുതല്‍ വരടിയം സ്കൂള്‍ വരെ 2.04 കിലോമീറ്റര്‍ ദൂരം 5 മീറ്റര്‍ വീതിയില്‍ ബിഎം & ബിസി ചെയ്യുന്നതിനും, 620 മീറ്റര്‍ കാന നിര്‍മ്മാണം നടത്തുന്നതിനും, 6 കലുങ്കുകള്‍ പുതുക്കി പണിയുന്നതിനും, 510 മീറ്റര്‍ നീളം കരിങ്കല്ല് പാര്‍ശ്വഭിത്തി നിര്‍മ്മാണം നടത്തുന്നതിനും, റോഡ് മാർക്കിങ്ങുകൾ ഉള്‍പ്പെടെയുള്ള റോഡ് സുരക്ഷാ പ്രവൃത്തികൾ നടത്തുന്നതിനും എസ്റ്റിമേറ്റില്‍ തുക വകയിരുത്തിയിട്ടുണ്ട്. അമല - ചൂരക്കാട്ടുകര റോഡ് 2.72 കിലോമീറ്റര്‍ ദൂരം 5.5 മീറ്റര്‍ വീതിയില്‍ ബിഎം & ബിസി ചെയ്യുന്നതിനും, 500 മീറ്റര്‍ കാന നിര്‍മ്മാണം നടത്തുന്നതിനും, 4 കലുങ്കുകള്‍ പുതുക്കി പണിയുന്നതിനും, റോഡ് മാർക്കിങ്ങുകൾ ഉള്‍പ്പെടെയുള്ള റോഡ് സുരക്ഷാ പ്രവൃത്തികൾ നടത്തുന്നതിനും എസ്റ്റിമേറ്റില്‍ തുക വകയിരുത്തിയിട്ടുണ്ട്. ഇതോടെ അമല സെൻ്ററിൽ നിന്നും തൃശ്ശൂർ ഗവൺമെൻ്റ് മെഡിക്കൽ കോളേജിലേക്ക് നേരിട്ട് വേഗത്തിൽ എത്താവുന്ന ഈ രണ്ട് റോഡുകളും ബി.എം & ബി.സി നിലവാരത്തിലേക്ക് ഉയരുകയാണ്. വടക്കാഞ്ചേരി മണ്ഡലത്തിലെ 4.76 കിലോമീറ്റർ റോഡ് കൂടി 6.5 കോടി രൂപ വകയിരുത്തി ബി.എം & ബി.സി നിലവാരത്തിൽ നവീകരിക്കുന്നതിനുള്ള ഈ പ്രവൃത്തിക്ക് സാങ്കേതികാനുമതി ലഭ്യമാക്കി ടെൻഡർ നടപടികൾ ത്വരിതഗതിയിൽ പൂർത്തിയാക്കാൻ നിർദ്ദേശം നൽകിയിട്ടുള്ളതായി എം.എൽ.എ അറിയിച്ചു.
.jpg)
0 അഭിപ്രായങ്ങള്‍