വടക്കാഞ്ചേരി ബൈപ്പാസ് ; ഹൈവേ റിസർച്ച് ഇൻസ്റ്റിറ്റ്യൂട്ട് നിർദ്ദിഷ്ട പാതയിൽ പരിശോധന നടത്തി.

വടക്കാഞ്ചേരി ബൈപ്പാസിന്റെ അന്തിമ ഡിപിആർ തയ്യാറാക്കുന്നതിനായി കേരള ഹൈവേ റിസർച്ച് ഇൻസ്റ്റിറ്റ്യൂട്ട് അധികൃതർ അലൈൻമെൻ്റ് പ്രകാരമുള്ള നിർദ്ദിഷ്ട പാതയിൽ പരിശോധന നടത്തി. ബൈപ്പാസിന്റെ ഡിപിആർ പൂർത്തിയാക്കി ഈ മാസം തന്നെ അംഗീകാരത്തിനായി സമർപ്പിക്കാൻ അധികൃതർക്ക് നിർദ്ദേശം നൽകിയതായി സേവ്യർ ചിറ്റിലപ്പിള്ളി എംഎൽഎ അറിയിച്ചു.

കിഫ്ബി പദ്ധതിയായ വടക്കാഞ്ചേരി ബൈപ്പാസിൽ ഉൾപ്പെടുന്ന റെയിൽവേ ഓവർ ബ്രിഡ്ജിന്റെ ജനറൽ അറേഞ്ച്മെന്റ് ഡ്രോയിങ് (ജി.എ.ഡി.) തയ്യാറാക്കിയത് കേരള റെയിൽ ഡെവലപ്മെന്റ് കോർപ്പറേഷനാണ്. കെ - റെയിലിന്റെ നേതൃത്വത്തിൽ ടോപ്പോഗ്രാഫിക്ക് സർവ്വേയും, സോയിൽ ഇൻവെസ്റ്റിഗേഷനും പൂർത്തിയാക്കി തയ്യാറാക്കിയ ജി.എ.ഡി. അംഗീകാരത്തിനായി ഫെബ്രുവരി മാസത്തിൽ തന്നെ നിർവ്വഹണ ഏജൻസിയായ കെ.ആർ.എഫ്.ബി മുഖേന സതേൺ റെയിൽവേ കൺസ്ട്രക്ഷൻ ഡെപ്യൂട്ടി ചീഫ് എൻജിനീയർക്ക് സമർപ്പിച്ചിരുന്നു. തുടർന്ന് ജൂൺ മാസം ആദ്യം റെയിൽവേയുടെ വിവിധ വിഭാഗങ്ങളിലെ എൻജിനീയർമാരും, കെ.ആർ.എഫ്.ബി - കെ- റെയിൽ എഞ്ചിനീയർമാരും സംയുക്തമായി സ്ഥല പരിശോധന നടത്തി റിപ്പോർട്ട് റെയിൽവേ സീനിയർ ഡിവിഷണൽ എൻജിനീയർക്ക് നൽകുകയും, ജൂൺ അവസാന വാരത്തിൽ റെയിൽവേ റോഡ് സേഫ്റ്റി വർക്ക് ചീഫ് എൻജിനീയറുടെ പരിശോധന റിപ്പോർട്ടോടുകൂടി അംഗീകാരത്തിനായി സതേൺ റെയിൽവേ ഹെഡ്ക്വാർട്ടേഴ്സിലേക്ക് നൽകുകയും ചെയ്തു. റെയിൽവേയുമായി ബന്ധപ്പെട്ട് അംഗീകാരം ലഭ്യമാക്കുന്നതിനുള്ള നടപടികൾ തുടർന്നുവരികയാണെന്ന് സേവ്യർ ചിറ്റിലപ്പിള്ളി എംഎൽഎ വ്യക്തമാക്കി.

കൊടുങ്ങല്ലൂർ ഷൊർണൂർ സംസ്ഥാനപാത 22-ൽ കരുതക്കാട് നിന്ന് ആരംഭിച്ച് അകമല വഴി നിലവിലെ സംസ്ഥാന പാതയിൽ അവസാനിക്കുന്ന 5.586 കി.മീ. നീളമുള്ള വടക്കാഞ്ചേരി ബൈപ്പാസിന്റെ ഡി.പി.ആർ തയ്യാറാക്കുന്നതിന്റെ ഭാഗമായി 32 പോയിൻ്റുകളിൽ മണ്ണ് പരിശോധനയും, വാഹനഗതാഗത സാന്ദ്രത പഠനവും (സി.ബി.ആർ. ട്രാഫിക് സർവ്വേ ഇൻവെസ്റ്റിഗേഷൻ) നേരത്തേ പൂർത്തിയാക്കിയിരുന്നു. കരട് ഡിപിആർ പരിശോധിച്ച പൊതുമരാമത്ത് ഹൈവേ ഡിസൈൻ യൂണിറ്റ്, RIQCL, KRFB അസിസ്റ്റന്റ് എക്സിക്യൂട്ടീവ് എൻജിനീയർമാരുടെ സംഘം നിർദ്ദിഷ്ട പാതയിലെ പഴയ അലങ്കാർ തിയറ്ററിനു പുറകിലായുള്ള പുഴപ്പാലം വരുന്ന മേഖല, മംഗലം റോഡ്, വാഴാനി - വടക്കാഞ്ചേരി റോഡ്, മാരാത്തുകുന്ന് റെയിൽവേ ഗേറ്റ് റോഡ് എന്നീ ബൈപ്പാസിനെ ക്രോസ് ചെയ്യുന്ന സ്ഥലങ്ങളിൽ സംയുക്ത പരിശോധന നടത്തി ആവശ്യമായ തിരുത്തലുകൾക്ക് ശിപാർശ നൽകി.

വടക്കാഞ്ചേരി സർവ്വീസ് കോ-ഓപ്പറേറ്റീവ് ബാങ്ക് പ്രസിഡൻ്റ് എൻ കെ പ്രമോദ് കുമാർ, മുൻ മുൻസിപ്പൽ വൈസ് ചെയർമാൻ എം ആർ സോമനാരായണൻ, പൊതുപ്രവർത്തകരായ വി എ സുരേഷ് കുമാർ, എം യു കബീർ, പി എം അബൂബക്കർ, വി സി മനോജ്, കേരള ഹൈവേ റിസർച്ച് ഇൻസ്റ്റിറ്റ്യൂട്ട് അസിസ്റ്റന്റ് എക്സിക്യൂട്ടീവ് എൻജിനീയർ അർച്ചന ആർ വി, അസിസ്റ്റന്റ് എൻജിനീയർമാരായ നമിത, കൃഷ്ണപ്രിയ, ജിയോ ടെക്നിക്കൽ എൻജിനീയർ അനുഷ, KRFB അസിസ്റ്റന്റ് എൻജിനീയർ രഞ്ജിത്ത് വി ജി, പ്രോജക്ട് എൻജിനീയർ ബിബിൻ തുടങ്ങിയവർ പരിശോധനയിൽ സന്നിഹിതരായിരുന്നു.